Mujh Jaisi Ladki Lyrics

Akeli khoyi khoyi si, woh alhad ladki
Ishq mein jaagi-soyi si diwaani ladki
Kaanon mein jhumke, chaal mein angdaai
Ek diwaane se dil lagaayi
Sab ne kaha paagal ho gayi hai paagal ladki
Ishq mein jaagi-soyi si diwaani ladki
Naa duniya ki samajh, naa sahi aur galat ka fark
Ishq ke rang se rang diya apne dil ka warak
Naa tajurba naa samajhdaari, badi kamsin thi woh
Toofaan mein kashti utaare, badi maasoom thi woh
Ishq ki kamaai se ghar-ghar khelti
Apni dhun mein mast, woh meera si ladki
Chaand se dil laga kar zameen se wafaayein maangti
Hawaaon se ladane waali, woh patang si ladki

Jab aankh khuli to thi nahin woh ab bhi wahi chhoti si ladki
Dil ko hatheli par paros kar dene waali, woh bholi si ladki
Kahte hain…kuch bhaari sa gujra tha uske naram se seene ke upar se
Ab zara naaptol kar hansti hai, woh manmauji si ladki
Haqeeqat darwaaje par dastak de rahi thi
Bhala palak jhapkaati toh kiske liye, woh sapanon jaisi ladki

Samet kar apni aabroo phir kalam uthaaegi
Khud apni kahaani likhegi, woh ziddi si ladki
Purja purja kar jodegi apna seena
Himmat kar phir dil lagaaegi, woh diler ladki
lafzon ko dhaal banaakar har makaan paaegi
Khud hi khud se baaten karne waali, woh kitaabon si ladki
Teekhi si meethi si woh hirani si ladki
Aaine mein dekho to mujh jaisi hi woh, mujh jaisi ladki.